ធ្វើដំណើរទៅកាន់ប្រទេសចិន គឺពិតជាបទពិសោធន៍ដ៏អស្ចារ្យ។ ប៉ុន្តែការយល់ដឹងពីក្បួន etiquette (礼仪 [lǐyí]) ក្នុងស្រុក អាចផ្លាស់ប្តូរដំណើរទស្សនកិច្ចរបស់អ្នកឲ្យកាន់តែសប្បាយរីករាយ និងប្រសើរឡើងបាន។ ការដែលដឹងនូវរបៀបរបបទាំងនេះ គឺអាចជួយអ្នកបានច្រើន ខណៈពេលដែលជនជាតិចិនផ្ទាល់ មិនរំពឹងថាអ្នកទេសចរទាំងអស់នឹងដឹងពីរបៀបរបបរបស់ពួកគេទាំងអស់នោះឡើយ។ បង្ហាញការគោរពចំពោះទំនៀមទម្លាប់របស់ពួកគេ គឺជាការបង្ហាញពីភាពគួរសម (礼貌 [lǐmào]) របស់អ្នក ហើយអាចនាំឱ្យមានអន្តរកម្មកាន់តែប្រសើរឡើង។ ខាងក្រោមនេះគឺជាគន្លឹះមួយចំនួនដែលអ្នកទេសចរភាគច្រើនមិនដឹង ប៉ុន្តែវាអាចធ្វើឱ្យជនជាតិចិនចាប់អារម្មណ៍ជាមួយនឹងអ្នក យ៉ាងខ្លាំង៖

១. ការគួរសមក្នុងការសួរសុខទុក្ខ និងការប្រាស្រ័យទាក់ទង៖

• ការប្រើដៃទាំងពីរ៖ នេះគឺជាក្បួនមាសមួយ។ នៅពេលអ្នកជូន ឬទទួលអ្វីមួយ មិនថាជាកាតអាជីវកម្ម អំណោយ ឬសូម្បីតែការបង់ប្រាក់ ចូរប្រើដៃទាំងពីរជានិច្ច។ កាយវិការនេះបង្ហាញពីការគោរពដ៏ខ្ពង់ខ្ពស់។
• ការហៅឈ្មោះ និងតំណែង៖ ការហៅឈ្មោះអ្នកផ្សេងទៀត អាចចាត់ទុកថាវារឿងមិនសមរម្យ ឬឈ្លើយ។ ជាពិសេសចំពោះមនុស្សចាស់ ឬមនុស្សដែលមានមុខតំណែងខ្ពស់។ គួរប្រើនាមត្រកូលរបស់ពួកគេ ហើយដាក់មុខតំណែងរបស់ពួកគេតាមក្រោយ ឧទាហរណ៍ដូចជា «លោកគ្រូ វ៉ាង» (王老师 [Wáng lǎoshī]) ឬ
  «អ្នកគ្រប់គ្រង លី» (李经理 [Lǐ jīnglǐ])។
• ការរក្សា «មុខមាត់» (面子 [miànzi])៖ «មុខមាត់» គឺជាគោលគំនិតដ៏សំខាន់នៅក្នុងសង្គមចិន។ ជាពិសេសកេរ្តិ៍ឈ្មោះ សេចក្តីថ្លៃថ្នូរ និងឋានៈសង្គមរបស់បុគ្គលគឺសំខាន់ណាស់ អ្នកត្រូវតែប្រយ័ត្នប្រយ៉ែងបំផុតចំពោះរឿងនេះ។ ចៀសវាងការរិះគន់ ការកែតម្រង់ ឬធ្វើឱ្យនរណាម្នាក់ទទួលរងនូវភាពអាម៉ាស់ជាសាធារណៈ ពីព្រោះថាវានឹងធ្វើឱ្យពួកគេ «បាត់បង់មុខមាត់» (丢脸 [diūliǎn])។ ការចេះទុកមុខឲ្យអ្នកដ៏ទៃគឺអាចធ្វើឱ្យអ្នកទទួលបាននូវការគោរពច្រើន។

២. Etiquette នៅលើតុអាហារ (餐桌礼仪 [cānzhuō lǐyí])

តុអាហារគឺជាកន្លែងដែលមានរបៀបរបបច្រើនបំផុត ហើយដែលអ្នកត្រូវតែចងចាំ ពីព្រោះថាវាជាកន្លែងដែលត្រូវបានផ្តល់នូវសារៈសំខាន់ច្រើនបំផុត ដែលអាចឆ្លុះបញ្ចាំងអំពីសីលធម៌ ឥរិយបថ និងអត្តចារិតជាដើម។ល។

• ក្បួនប្រើចង្កឹះ (筷子 [kuàizi])៖
  • កុំដោតចង្កឹះបញ្ឈរនៅក្នុងចាន ឬឆ្នាំងពីព្រោះវាមានសណ្ឋានស្រដៀងនឹងធូបដែលប្រើក្នុងពិធីបុណ្យសព។
  • កុំយកចង្កឹះដើម្បីចង្អុលទៅកាន់អ្នកដទៃ។
  • កុំគោះចង្កឹះនឹងចាន ឬមាត់ចាន។ ពីព្រោះនេះគឺជាអាកប្បកិរិយារបស់អ្នកសុំទាន។
  • កុំប្រើចង្កឹះរបស់អ្នក ចាប់យកអាហារនៅក្នុងចានអាហារួម។ ចូរចាប់យកដុំអាហារដែលនៅជិតបំផុត។
• ការលើកកែវ ឬ «ជល់កែវ» (干杯 [gānbēi])៖ នៅពេលអ្នកជល់កែវជាមួយមនុស្សចាស់ ឬអ្នកដែលមានអយុច្រើនជាង ឬថានៈខ្ពស់ជាងយើង អ្នកគួរតែដាក់មាត់កែវរបស់អ្នកឲ្យទាបជាងកែវរបស់គេបន្តិច ដើម្បីបង្ហាញការគោរព។។ ពាក្យ «干杯» មានន័យត្រង់ថា «ផឹកឲ្យអស់ ឬលើកឲ្យដាច់» ប៉ុន្តែអ្នកមិនចាំបាច់ផឹកឲ្យអស់នោះទេ លុះត្រាណាតែមនុស្សចាស់ ឬអ្នកមានថានៈខ្ពស់ជាងអ្នកប្រាប់អ្នក ឲ្យធ្វើវា។
• កាយវិការ «អរគុណ» ពេលហូបតែ៖ នៅពេលនរណាម្នាក់ចាក់ទឹកតែជូនអ្នក អ្នកអាចយកម្រាមដៃកណ្តាល និងដៃចង្អុលគោះលើតុស្រាលៗចំនួនពីរដងនៅក្បែរកែវតែនោះ ដើម្បីបង្ហាញនូវការអរគុណ។ កាយវិការនេះត្រូវបានគេស្គាល់ថា «叩手礼» (kòushǒulǐ) ។
• ការដណ្តើមគ្នាចេញលុយ៖ អ្នកប្រហែលជាមានការចម្លែកចិត្តពេលឃើញជនជាតិចិន “ដណ្តើមគ្នាចេញលុយ យ៉ាងខ្លាំងក្លា” ក្រោយពីញ៉ាំអាហារួច។ នេះជាទម្លាប់ដែលបង្ហាញពីចិត្តសប្បុរស និងការគោរព។ ប៉ុន្តែប្រសិនបើអ្នកពិតជាចង់រ៉ាប់រងការចំណាយមែននោះ មិនបាច់ធ្វើបែបនោះទេ ធ្វើដូចជាទៅបន្ទប់ទឹក រួចហើយចេញលុយសម្រាប់ការចំណាយថ្លៃអាហារនោះទៅ គឺជាការស្រេច។

៣. ការជូនអំណោយ និងការទៅលេងផ្ទះ (送礼与做客 [sònglǐ yǔ zuòkè])

• កុំទៅដៃទទេ៖ នៅពេលនរណាម្នាក់អញ្ជើញអ្នកទៅផ្ទះគេ សូមកុំទៅដៃទទេ សូមនាំយកអំណោយតូចមួយ ដូចជាផ្លែឈើ តែ ឬវត្ថុអនុស្សាវរីយ៍ពីប្រទេសកំណើតរបស់អ្នក។
• ការបដិសេធដោយភាពគួរសម៖ ជាធម្មតាម្ចាស់ផ្ទះនឹងបង្ហាញអារម្មណ៍មិនចង់ទទួល ប៉ុន្តែពួកគេនឹងប៉ះអំណោយរបស់អ្នក 2-3 ដងមុនពេលទទួលយកវា។ នេះគឺជាផ្នែកមួយនៃការបន្ទាបខ្លួន។ អនុញ្ញាតឱ្យពួកគេទទួលយកវាដោយសន្សឹមៗ កុំបង្ខំ។
• អំណោយដែលគួរជៀសវាង៖ ចៀសវាងការផ្តល់អំណោយជានាឡិកា (ស្តាប់ទៅដូចជាការបញ្ជូនវិញ្ញាណ ឬលាគ្នាចុងក្រោយនៅថ្ងៃបូជាសព) ឬផ្លែសាលី (ស្តាប់ទៅដូចជាការបែកគ្នា ជាពិសេសសម្រាប់គូស្នេហ៍) ឬឆ័ត្រ (伞 [sǎn] ស្តាប់ទៅដូចជាពាក្យសម្រាប់ការបែកបាក់) និងវត្ថុមុតស្រួច (មានន័យថាកាត់ផ្តាច់ទំនាក់ទំនង) ។
• ការការវេចខ្ចប់អំណោយ៖ ពណ៌ក្រហម (红色 [hóngsè]) និងពណ៌មាសគឺល្អបំផុត ព្រោះវាជាពណ៌សំណាង។ ចូរកុំប្រើក្រដាសរុំអំណោយពណ៌ស ឬខ្មៅ។

សេចក្តីសន្និដ្ឋាន

ការរៀនសូត្រអំពីរបៀបរបប ឬសីលធម៌ក្នុងសង្គមចិនទាំងនេះ គឺជាវិធីមួយដើម្បីបង្ហាញការយកចិត្តទុកដាក់ និងការគោរពចំពោះមនុស្សផ្សេងគ្នា។ ពីព្រោះមនុស្សនឹងរំពឹងថាអ្នកល្អឥតខ្ចោះ ចំពោះគេ។ ការយល់ដឹងនូវរបៀបរបបទាំងនេះ នឹងធ្វើពួកគេមានអារម្មណ៍ស្និទ្ធស្នាលជាមួយនឹងអ្នកយ៉ាងខ្លាំង ហើយបើកទ្វារទទួលមិត្តភាពពិត និងឨកាសផ្សេងៗ។

តើគន្លឹះមួយណាដែលធ្វើឱ្យអ្នកភ្ញាក់ផ្អើលជាងគេ? តើអ្នកមានគន្លឹះផ្ទាល់ខ្លួនក្នុងការសាងមិត្តភាព នៅពេលធ្វើដំណើរដែរឬទេ? 

សិក្សាពាក្យ៖

1. 礼仪 (lǐyí) – Etiquette, ទំនៀមទម្លាប់
2. 礼貌 (lǐmào) – សុជីវធម៌, ការគួរសម
3. 王老师 (Wáng lǎoshī) – លោកគ្រូ វ៉ាង
4. 李经理 (Lǐ jīnglǐ) – អ្នកគ្រប់គ្រង លី
5. 面子 (miànzi) – មុខមាត់ (កិត្តិយស)
6. 丢脸 (diūliǎn) – បាក់មុខ
7. 餐桌礼仪 (cānzhuō lǐyí) – របៀបរបបនៅលើតុអាហារ
8. 筷子 (kuàizi) – ចង្កឹះ
9. 干杯 (gānbēi) – ជល់កែវ ឬលើកឲ្យដាច់
10. 叩手礼 (kòushǒulǐ) – កាយវិការគោះម្រាមដៃអរគុណ
11. 送礼 (sònglǐ) – ការជូនអំណោយ
12. 做客 (zuòkè) – ការទៅលេងផ្ទះនរណាម្នាក់
13. 伞 (sǎn) – ឆ័ត្រ (ស្តាប់ទៅដូចជាពាក្យថាបែកគ្នា)
14. 红色 (hóngsè) – ពណ៌ក្រហម
    
    

    ដោយក្តីស្រលាញ់ រាប់អាន
    លោកគ្រូនី វាសនា