របៀបកែតម្រូវអ្នកដទៃដោយភាពអត់ធ្មត់ និងក្តីស្រឡាញ់

ការកែតម្រូវអ្នកដទៃគឺជាសិល្បៈមួយដែលត្រូវការភាពឈ្លាសវៃ និងក្តីអាណិតអាសូរ។ ជាញឹកញាប់ ពេលដែលយើងឃើញអ្នកណាម្នាក់ធ្វើអ្វីមួយខុស យើងមានប្រតិកម្មភ្លាមៗដោយការរិះគន់ឬស្តីបន្ទោស ដែលជាធម្មតានាំឱ្យកើតមានអារម្មណ៍អវិជ្ជមាន និងធ្វើឱ្យទំនាក់ទំនងប្រេះស្រាំ។ ចុះតើមានវិធីប្រសើរជាងនេះ ដើម្បីកែតម្រូវអ្នកដទៃដោយរក្សាភាពថ្លៃថ្នូរដែរឬទេ? ខាងក្រោមនេះ ខ្ញុំនឹងធ្វើការចែករំលែកអំពីរបៀបកែតម្រូវអ្នកដទៃដោយភាពអត់ធ្មត់ និងក្តីស្រឡាញ់ ដើម្បីធ្វើឱ្យទំនាក់ទំនងរបស់អ្នកកាន់តែល្អប្រសើរឡើង។

ជៀសវាងការធ្វើតាមអារម្មណ៍ខ្លាំងពេក
ពេលដែលយើងឃើញអ្វីមួយខុសឆ្គង ជាធម្មតាយើងមានអារម្មណ៍ក្រោធ ឬខកចិត្ត។ ប៉ុន្តែការកែតម្រូវនរណាម្នាក់ពេលដែលយើងកំពុងមានអារម្មណ៍ក្រោធខ្លាំង អាចនាំឱ្យមានលទ្ធផលអវិជ្ជមាន។ ពីព្រោះថាវាអាចប​ណ្តាលឲ្យយើងអាចនិយាយពាក្យមិនសមរម្យចេញមកបាន ឬប្រើសម្តីដែលបង្កឱ្យមានការឈឺចាប់ដល់អ្នកដទៃទៀតផង។

ឧទាហរណ៍៖ ប្រសិនបើកូនរបស់អ្នកធ្វើឱ្យប្រឡាក់កម្រាលព្រំនៅក្នុងផ្ទះ អ្នកអាចមានអារម្មណ៍ក្រោធភ្លាមៗ ហើយស្រែកថា “ហេតុអ្វីបានជាកូនមិនចេះប្រយ័ត្នសោះ បែបនេះ? ប្រាប់ច្រើនលើក ច្រើនសារហើយ​ ម្តេចនៅតែដដែលៗអ៊ីចឹង!” ការប្រតិកម្មបែបនេះអាចធ្វើឱ្យកូនមានអារម្មណ៍ថារងភាពអាម៉ាស់ និងបាត់បង់ទំនុកចិត្តលើខ្លួនគេទៅថ្ងៃក្រោយ។

ជំនួសឱ្យការប្រតិកម្មភ្លាមៗ យើងគួរដកដង្ហើមវែងៗ ចំណាយពេលពីរបីនាទីដើម្បីសម្ងំចិត្ត ឲ្យរាងស្រាកស្រាន្តបន្តិច រួចចូលទៅរកកូនដោយចិត្តស្ងប់ និងនិយាយពន្យល់គេដោយសន្តិភាព។ ការធ្វើបែបនេះនឹងជួយឱ្យការសន្ទនារបស់អ្នកទាំងពីរ កាន់តែមានប្រសិទ្ធភាព និងមិនបំផ្លាញទំនាក់ទំនងរវាងអ្នក និងកូនផងដែរ។

ប្រើការសង្កេត មិនមែនការវិនិច្ឆ័យ
ពេលកែតម្រូវអ្នកដទៃ យើងគួរប្រើការពិពណ៌នាពីអ្វីដែលយើងបានឃើញ ឬឮ ជំនួសឱ្យការវិនិច្ឆ័យលើអត្តចរិតរបស់ពួកគេ។ ការចេះប្រើប្រាស់ពាក្យសម្តីដូចជា “ខ្ញុំបានសង្កេតឃើញថា…” ឬ “ខ្ញុំបានកត់សម្គាល់ឃើញថា…” អាចជួយឱ្យការសន្ទនាកាន់តែមានភាពវិជ្ជមាន។

ជាឧទាហរណ៍ ប្រសិនបើសហការីម្នាក់លួចគំនិតរបស់អ្នកថាជាគំនិតរបស់គេ នៅក្នុងកិច្ចប្រជុំមួយ ជំនួសឱ្យការនិយាយថា “អ្នកលួចគំនិតរបស់ខ្ញុំ” អ្នកអាចនិយាយថា “ខ្ញុំបានកត់សម្គាល់ឃើញថាគំនិតដែលអ្នកបានលើកឡើងនៅក្នុងកិច្ចប្រជុំនេះ មានលក្ខណៈស្រដៀងគ្នាទៅនឹងអ្វីដែលយើងបានពិភាក្សាគ្នា កាលពីសប្តាហ៍មុន។”

កែតម្រូវជាលក្ខណៈឯកជន
ការកែតម្រូវនរណាម្នាក់នៅចំពោះមុខអ្នកដទៃ អាចនាំឱ្យពួកគេមានអារម្មណ៍អាម៉ាស់ ឬមិនឲ្យតម្លៃអ្នកឡើយ។ ជាធម្មតា យើងគួរកែតម្រូវជាឯកជនវិញ តាមដែលអ្នកអាចធ្វើទៅបាន។

ឧទាហរណ៍ ប្រសិនបើអ្នកជាគ្រូបង្រៀន ហើយសិស្សម្នាក់ឆ្លើយសំណួរមិនត្រឹមត្រូវ ជំនួសឱ្យការកែតម្រូវភ្លាមៗនៅចំពោះមុខមិត្តរួមថ្នាក់ អ្នកអាចនិយាយថា “សូមអរគុណសម្រាប់ការចូលរួមចំណែករបស់អ្នក។ តើយើងអាចមានចម្លើយផ្សេងទៀត ដែរឬទេ?

រួចនិយាយជាមួយសិស្សនោះដោយឡែកនៅពេលក្រោយ ដើម្បីពន្យល់ពីចម្លើយត្រឹមត្រូវ។

ការប្រើបច្ចេកទេសសាំងវិច
ការកែតម្រូវតាមបច្ចេកទេសសាំងវិច មានន័យថាយើងចាប់ផ្តើមដោយការលើកទឹកចិត្ត បន្ទាប់មកផ្តល់មតិកែលម្អ ហើយបញ្ចប់ដោយការលើកទឹកចិត្តម្តងទៀត។ វិធីនេះជួយឱ្យអ្នកដែលទទួលការកែតម្រូវមានអារម្មណ៍ល្អ និងបើកចិត្តទទួលយកការកែលម្អ។

ឧទាហរណ៍ ប្រសិនបើអ្នកជាប្រធានក្រុម ហើយចង់កែតម្រូវបុគ្គលិកម្នាក់ដែលធ្វើបទបង្ហាញមិនសូវល្អ អ្នកអាចនិយាយថា៖ “ខ្ញុំពិតជាចូលចិត្តរបៀបដែលអ្នកបានរៀបចំស្លាយ និងរចនាសម្ព័ន្ធនៃបទបង្ហាញរបស់អ្នកខ្លាំងណាស់។ វាមានភាពច្បាស់លាស់ណាស់។ ខ្ញុំគិតថាបទបង្ហាញនឹងកាន់តែល្អប្រសើរថែមទៀត ប្រសិនបើអ្នកអាចបន្ថែមឧទាហរណ៍ជាក់ស្តែងខ្លះៗដើម្បីគាំទ្រចំណុចសំខាន់ៗមួយចំនួន។ ជារួម ខ្ញុំសូមកោតសរសើរចំពោះកិច្ចខិតខំប្រឹងប្រែងរបស់អ្នក និងរបៀបដែលអ្នកបានឆ្លើយសំណួរបានយ៉ាងល្អ។”

ទទួលស្គាល់ឥរិយាបថដែលបានកែតម្រូវ
ពេលដែលអ្នកដទៃធ្វើការកែប្រែតាមការណែនាំរបស់អ្នក ការទទួលស្គាល់ការប្រឹងប្រែងរបស់ពួកគេក្នុងការកែប្រែតាមអ្នក គឺជារឿងសំខាន់ណាស់។ ការធ្វើបែបនេះនឹងលើកទឹកចិត្តឱ្យពួកគេបន្តធ្វើ ឱ្យបានកាន់តែប្រសើរឡើង។

ឧទាហរណ៍ ប្រសិនបើអ្នកបានស្នើឱ្យមិត្តរួមការងារណាម្នាក់​ បង្កើនការចូលរួមនៅក្នុងកិច្ចប្រជុំ ហើយពួកគេចាប់ផ្តើមចែករំលែកគំនិតច្រើនជាងមុន អ្នកគួរនិយាយថា “ខ្ញុំពិតជាចូលចិត្តគំនិតដែលអ្នកបានចែករំលែកនៅក្នុងកិច្ចប្រជុំថ្ងៃនេះណាស់។ វាពិតជាមានប្រយោជន៍ណាស់ ហើយជួយឱ្យយើងមើលឃើញបញ្ហាពីគ្រប់ជ្រុងជ្រោយទៀតផង។”

សរុបជារួមមក ការកែតម្រូវអ្នកដទៃដោយភាពអត់ធ្មត់ និងក្តីស្រឡាញ់ គឺជាជំនាញដ៏មានតម្លៃដែលអាចជួយពង្រឹងទំនាក់ទំនង និងលើកកម្ពស់ការរីកចម្រើនរបស់អ្នកដទៃ។ តាមរយៈការកាត់បន្ថយការធ្វើតាមអារម្មណ៍ ការប្រើការសង្កេតជំនួសឱ្យការវិនិច្ឆ័យ ការកែតម្រូវជាឯកជន ការប្រើបច្ចេកទេសសាំងវិច និងការទទួលស្គាល់ឥរិយាបថដែលបានកែតម្រូវ គឺយើងអាចជួយអ្នកដទៃឱ្យរីកចម្រើន ដោយមិនធ្វើឱ្យពួកគេមានអារម្មណ៍មិនល្អឡើយ។

ការអនុវត្តតាមគោលការណ៍ទាំងនេះមិនត្រឹមតែជួយឱ្យអ្នកដទៃកែលម្អខ្លួនគេបានប៉ុណ្ណោះទេ ប៉ុន្តែថែមទាំងជួយឱ្យអ្នកក្លាយជាអ្នកដឹកនាំ មិត្ត ឬសមាជិកគ្រួសារដែលគួរឱ្យគោរព និងស្រឡាញ់ផងដែរ។ ការកែតម្រូវក្នុងន័យស្ថាបនាគឺជាអំណោយដ៏មានតម្លៃ ដែលបង្ហាញពីការយកចិត្តទុកដាក់ និងក្តីស្រឡាញ់របស់យើងចំពោះអ្នកដទៃ។

ដោយក្តីស្រាលាញ់ រាប់អាន
លោកគ្រូនី វាសនា